Югары Утар акылга зәгыйфь булган балалар йорты-интернатының “Шәфкатьлелек” бүлегендә "Яратканнарга бүләк" открытка ясау шөгыле.

2020 нче елның 22 ноябрендә Югары Утар акылга зәгыйфь булган балалар йорты-интернатының “Шәфкатьлелек “ бүлегендә тәрбияче Тимергалиева А.Н. "Яратканнарга бүләк" дигән тема астында открыткалар ясау шөгыле үткәрде. Максатлар: үз кулларың белән открыткалар ясарга өйрәтү; кулларыңның вак моторикасын, иҗади күзаллауны үстерү; дөрес эш алымнары, аппликация күнекмәләрен камилләштерү; мөстәкыйльлек, пөхтәлек, якыннарыңа мәхәббәт тәрбияләү. Иң җылы һәм назлы бәйрәмнәрнең берсе - Әниләр көне якынлаша. Барлык балалар һәм өлкәннәр чираттагы тапкыр әниләренә мәхәббәтләрен белдерәләр.Безнең балалар йортында да бу бәйрәмгә зур роль бирелә: балаларда әнигә карата мәхәббәт, зур рәхмәт, тирән хөрмәт тәрбияләнә. Бу көнгә балалар шигырьләр, җырлар өйрәнәләр, бүләкләр әзерлиләр. Иң яхшы бүләк, билгеле булганча, үз кулларың белән эшләнгән, яратып һәм чын күңелдән! Әниләр көненә балалар йортында тәрбияләнүчеләр үз куллары белән открыткалар ясадылар һәм иң яраткан кешеләренә бүләк иттеләр. Башта балалар тәрбияче белән бергә открытка формасын һәм төсен сайладылар. Аннан төсле картоннан чүлмәк һәм чәчәкләр кистеләр. Детальләрне җентекләп ябыштырдылар. Барысының да матур, якты открыткалар килеп чыкты. Балалар бик канәгать калдылар.