Республика Президенты Рөстәм Нургали улы Миңнеханов инициативасы белән Татарстанда "Ярдәм янәшә! Помощь рядом!" акциясе игълан ителде
Республика Президенты Рөстәм Нургали улы Миңнеханов инициативасы белән Татарстанда "Ярдәм янәшә! Помощь рядом!" акциясе игълан ителде.
Әлеге акция кысаларында районыбызның 478 мохтаҗ кешесенә азык-төлек, ашамлыклар тутырган пакетлар белән ярдәм ителде. Автопоезддан азык-төлекне бушатырга район яшьләр бүлеге волонтерлары ярдәм итсә, билгеләнгән пунктка кадәр илтергә авыл җирлекләре җитәкчеләре, социаль хезмәткәрләр һәм волонтерлар булышты.
Район башлыгы Рамил Рәшит улы Нотфуллин беренчеләрдән булып азык-төлек җыелмасын Кариле авылында яшәүче Садиковлар гаиләсенә тапшырды. Ул шулай ук балигъ булмаган балалары булган Галиевлар, Хәйруллиннар (Норма авылы), Шәйхетдиновлар (Кили авылы) һәм Сәлаховлар (Балтач ш.т. б.) гаиләләренә дә азык-төлек пакетларын тапшырды. Ярдәм алучылар әлеге акциядә катнашкан һәркемгә: инициатор Рөстәм Миңнехановка, спонсорларга, Хезмәт, мәшгульлек һәм социаль яклау министрлыгы хезмәткәрләренә, волонтерларга, авыл җирлекләре җитәкчеләренә рәхмәт сүзләрен җиткерделәр.