«Изгелек» инвалидларны тернәкләндерү үзәгендә «Күңелле туп чемпионаты» дигән спорт-сәламәтләндерү чарасы
Яр Чаллы шәһәренең «Изгелек» инвалидларны тернәкләндерү үзәгендә физик культура дәвалау инструкторы Ләйсән Зиянгирова «Күңелле туп чемпионаты» дигән спорт-сәламәтләндерү чарасы үткәрде.
Чараның максаты: социаль хезмәт алучыларның физик һәм психик сәламәтлеген ныгыту, спорт чарасында актив катнашуга җәлеп итү иде.
«Күңелле туп чемпионатында» катнашучылар бер-берсен җылы сәламләделәр, команда капитаннары ярышларга әзерлек турында рапорт бирделәр. Бүгенге матчта катнашучыларның төп спорт инвентаре туплар булды. Очрашу дәвамында уенчылар ару-талуны белмичә йөгерделәр, тупларны куып тоттылар, аларны бер-берсенә ташладылар, кәрҗингә төгәл керттеләр.
Соңгы чемпионатта катнашучылар, голларны төгәл кертеп, чын футболчыларга әверелделәр.
«Күңелле туп чемпионаты» уенында ике якның да баллары тигез булды. Ике команда да лаеклы җиңүчеләр: көчлеләр, җитезләр! Саубуллашканда барысы да бер-берсенә яңа стартлар һәм җиңүләр теләделәр.