Халыкка социаль хезмәт күрсәтү учреждениеләре

Бүген әгерҗелеләр “Татарстан чаңгы юллары“ акциясенә кушылдылар

2020 елның 10 феврале, дүшәмбе

Матур традиция буенча бүген Әгерҗедә “Татарстан чаңгы юллары“ акциясе узды. Аның быелгысы ТАССРның 100 еллыгына багышланды. Мәктәп укучылары, хезмәт коллективлары эшче-хезмәткәрләре “Орешник“ ял паркында өч-биш чакрымлы дистанцияләрне уздылар. Спорт бәйрәменә “Өмет“ халыкка ярдәм күрсәтү үзәге хезмәткәрләренең барысы да килгән иде. Һәр спорт чарасында активлыклары белән аерылып торучы гүзәл затларның күбесе чаңгыда йөрү осталыгын күрсәтте. Кайберләре аларга көч бирделәр. Акциядә катнашучыларны спорт бүлеге җитәкчесе Илдар Идиятов сәламләде һәм аларның һәрвакыт спорт белән дус булуларын теләде.

Башка елларда коллективлар күбрәк була торган иде. Быел катнашучылар азрак. Әгерҗелеләрнең активлыгы җитми, диде ул.

Спорт мәктәбе директоры урынбасары Наталья Мөхәммәтҗанова да “Орешник“ ял паркында ял көннәрендә чаңгыда йөрүчеләр бик күп булуын, ә ярышларда азрак катнашуларын билгеләп үтте. Ә кемнәр чаңгы юлларына баскан, аларның берсе дә үкенмәгәннәрдер. Саф һава, биек наратлар арасыннан узучы юл... Эш көненнән соң рәхәтләнеп ял итеп, активлыкларын арттырдылар алар. Хезмәт коллективларыннан соң чаңгы юлларына мәктәп укучылары чыкты.

БАРЛЫК ЯҢАЛЫКЛАРНЫ УКУ