«Әти көне», Балтач
2019 елның 24 гыйнварында Балтач муниципаль районының «Әтиләр Берлеге» Республика иҗтимагый оешмасының Балтач бүлекчәсе «Наз» халыкка социаль хезмәт күрсәтү үзәге белгечләре белән берлектә балигъ булмаган балалар өчен «Әти көне» үткәрделәр. Чара «Дулкын» бассейнында узды. «Наз» халыкка социаль хезмәт күрсәтү үзәге директоры Гөлнара Әхмәдиева һәм район «Әтиләр берлеге» рәисе Булат Зыятдиновның сәламләү сүзләреннән соң психологлар «Стрессны киметү ысуллары» дигән профилактик күнегүләр үткәрде. Бер-беребез белән танышу уен формасында узды. Һәр катнашучы үз исеменең әһәмияте турында сөйләде һәм стрессны бетерүнең үз ысуллары турында фикер алышты. Дәрес ахырында стресслардан арыну турында белешмәләр таратылды. Чараның икенче өлеше-бассейнда йөзү һәм анда алынган тәэсирләр белән тулы иде. Балалар һәм аларның әти-әниләре бик шат булдылар, оештыручыларга рәхмәт белдерделәр. Чараның нәтиҗәсе булып район кулланучылар җәмгыяте оештырган уртак чәй эчү булды. Балалар истәлекле бүләкләр алдылар.