"Возрождение" үзәгендә Толстой рәсемен ясадылар
8 сентябрь көнне Бөгелмәнең "Возрождение" мөмкинлекләре чикле балалар һәм яшүсмерләр өчен тернәкләндерү үзәгендә Лев Толстой әсәрләре буенча уен-сәяхәт үткәрелде. "Һөнәр йорты" белгечләре белән берлектә үткәрелгән әдәби чара рус классигының тууына 190 ел тулуга багышланган иде.
Язучының әсәрләре белән танышу танып-белү презентациясе белән үрелеп барды. Шулай ук табышмаклар, Толстойның гыйбарәләре дә яңгырады. Чара барышында балалар рус халык уеннары уйнады, "Филиппок" мультфильмы карады. Бөгелмә рәссамы Анатолий Владимирович Сурковтан мастер-класс оештырылды, аның барышында барлык катнашучылар да Лев Толстойның портретын ясый алдылар.
Уен-сәяхәт балаларның язучы тормыш юлы һәм иҗат эшчәнлеге турындагы белемнәрен киңәйтү максаты белән оештырылды.