Бурыч меңнәр белән исәпләнә

Бурыч меңнәр белән исәпләнә

Халыкны кабул итү суд приставы-башкаручы Елена Молчанова, район башкарма комитеты җитәкчесе урынбасары Римма Гыйльметдинова, халыкны социаль яклау бүлеге җитәкчесе Альмира Зарипова, социаль хезмәтнең башка вәкилләре катнашында узды.

Һәр мөрәҗәгать итүче аерым-аерым тыңланды. Аларның язмышлары төрле булса да, алимент белән бәйле проблемалары булу берләштерә.

• Минем кызларымның берсенә – 13, икенчесенә 16 яшь инде. Ирем белән аерылышканда төпчегенә 9 ай гына иде әле. Менә шуннан бирле бер тиен дә алимент алалганым юк. Дөрес, төпчеге әтисе белән яши хәзер. Әмма аларны үстергәндә миңа бик авыр булды. Шуңа 2011 елга кадәр чор өчен алиментны юллыйсым килә. Бурыч 300 меңсум тирәсе җыелды инде, – ди Әгерҗедән килгән ханым. Җәмәгате хәзерге вакытта Төмән ягында яшәгәнлектән, бу мәсьәлә белән әлеге өлкәнең суд приставларына мөрәҗәгать иткән ул, әмма нәтиҗәсе генә булмаган.

Икенче ханым да 2013 елдан бирле алимент акчаларын алалмый икән. Аның да алимент  акчалары 170 мең сумнан арткан инде. Акча юллап төрле урыннарга мөрәҗәгать итеп караган.

• Хәзер ирнең кайда икәнлеге дә билгеле түгел, – ди, борчылып.

Берьялгызы дүрт баланы тәрбия кылучы ир-атны тыңлаганда, йөрәк аеруча үртәлде. Кечесенә нибары 4, олысына да 11 генә яшь булган бу балаларның әниләре сабыйлары турында бөтенләй уйламый микәнни соң?!

• Мин аның алимент түләячәгенә дә ышанмыйм, –дисә дә, ир-атка алимент юллап гариза язарга киңәш ителде. Чөнки ул чакта торак-коммуналь хезмәтләр өчен түләүдә ташламалардан файдаланырга мөмкин булачак.

Кабул итүгә килгән тагын бер ханымның алимент түләүдә үзенең бурычы йөз меңнәр белән исәпләнә.Төгәлрәк әйткәндә, олы баласына алимент буенча 600, кечесенә 150 мең  сум бурычы җыелган. Хәзерге вакытта төпчек баласы белән декрет ялында булган ханымның ялы беткәнче бурычы тагын да артачак.

• Кечкенә балагызга 1,5 яшь тулгач, рәсми рәвештә эшкә урнашырга туры килер. Алмент түләмәгән өчен җинаять җаваплылыгына тарту ихтималы барлыгын да онытмагыз, – дип кисәтелде әлеге ханым.

Гомумән, һәр мөрәҗәгать итүчегә алиментларны түләттерү буенча мөрәҗәгать итү, судка документлар җыю, гариза язу тәртипләре аңлатылды.

Киләсе кабул итү көне октябрьнең беренче сишәмбесендә узачак. Ул 2сенә туры килә.    Алимент түләүгә кагылышлы сораулар белән 21153, 25333 телефоннарына шалтыратырга мөмкин.

Белешмә.

Россия Федерациясе Гаилә кодексының 80нче маддәсе буенча, ата-аналар үз балаларын тәрбияләп торырга тиеш. Әгәр ата-аналар алимент түләми икән, аларны судка тарталар. Суд карары буенча ата-анадан алимент түләттерелә башлый. Ул бер балага хезмәт хакының дүрттән бер өлеше, ике балага өчтән бер өлеш, өч һәм аннан да күбрәк балаларга ярты хезмәт хакы күләмендә түләнә.