Хәтерләрен яңарттылар
Бүген Федоровка интернат-йортында социаль хезмәт алучылар тәрбияче Рәйсә Гайнуллина һәм культорганизатор Лилия Лукина белән Аксубай Туган якны өйрәнү музеенда булдылар. Экскурсиянең максаты – яңа экспонатларны карау, хәтерне яңарту.
Музей хезмәткәрләре Әлфия Нурхаметова һәм Рәмзия Хаматгатина кунакларны ачык йөз белән каршы алып, аларга район тарихы, танылган шәхесләр турында сөйләделәр, музей экспонатларын күрсәттеләр. Интернат-йортта яшәүче өлкән яшьтәге әби-бабайларыбыз үзләренең истәлекләре белән уртаклаштылар. Аркадий бабай ничек итеп чабата үрергә кирәклеге турында сөйләде, Елизавета Якимова белән Мансур абый Исхаков йон эрләп күрсәттеләр. Александр Панинны Сугышчан дан бүлегендәге экспонатлар кызыксындырды. Ә чуаш орнаменты белән чигелгән әйберләр күргәзмәсе барысына да бик ошады. Экскурсиядән барысы да яхшы тәэсирләр белән кайттылар.